-na-

Chiah puam hun a ni em?

CHIAH PUAM HUN A NI EM ?.

Laleng Mawia, Financial Consultant, Mizo Tax Consultancy

Chiahpuam thawmin nikum kum tawp lam nasa fe in min ti buai a.A rampum buaiin kan buai a nih kha.Mipui ten awlsam taka pawisa neih kan tum zia te,buara leh artui bawm ringawt atanga interest tha tak a lo chhuak  mai tur ang a kan ngaih thin dan te a tang khan sum buai in kan buai a ni ber.Chiahpuam khan system fel tak engmah zawm a nei lo a.Local system han tih theih pawh a ni chuang lo.Local ai pawha la local tak hi a ni ringawt mai.Chuvangin tun tumah hi chuan chiahpuam kha ngam deuh deuh kan tam bawk a,thianghlim taka chiahpuam,sawrkar (IRDA,SEBI,RBI) hriatpuia chiahpuam hi in lo ngaihven ve thung teh ang.

Mizoramah hian sum chiahpuamna tur chi hrang hrang a tam ve tawh hle mai a.Tun hma kha chuan State Bank of India deuh chauh kha bank kan neih thin kha a ni a.SBI bakah khan Apex Bank,MUCO leh MRB te kha a ni mai bawk.Tunah chuan public sector bank mai bakah private sector bank lian tak tak mai Aizawl hmun ngeiah pawh pahnih lai kan nei vet a a.Heng bakah hian tunhma a LIC chauh insurance company awm thin kha tunah chuan Reliance,ICICI Prudential,Birla Sunlife bakah TATA AIG te pawh kan lo hmelhriat ve ta a.Hmasawnna rahbi pakhat chu a ni kan ti lo thei lo ang.Tunlai chuan banking ringawt atangin miin pawisa hlawkna emaw dah pun leh peipun hi an ti tawh lo a.Stock market ah an sum te invest in,tamtak chuan real estate ah te a pung a tam duh an tih thin vangin sum an invest teuh teuh thin..Chuvangin Mizote pawhin tun hmaa kan hriat ngai loh Mutual Fund tih te,Bond Fund tih te leh ULIP (Unit Linked Insurance Plan) tih te kan lo hmelhriat chho ta a.A biktakin tun hnaiah Mizo ten ULIP hi kan la chho nasa ta hle a.Company rintlak tak erawh chu kan zawn thiam a pawimawh bakah an agent te an rintlak em tih kan hrechiang tur a ni.

Engtin nge company ten share an zawrh- Chiahpuam Vrs Stock Market

Stock market in mipuite hnena an product hrang hrang an tawk tarh dan tlem i lo sawi hmasa the ang.Aizawl pa pakhat hausa ve tawk takin Zarkawtah building,in leh dawra luah theih tur a sa (build) dawn a, a ma sum in a daih loh avangin pawl thenkhat leh mimal hnen ah ‘in pawisa rawn thawh ve ula, tichuan a hlawkna kan insem dawn nia’ a ti a. Affidavit satliah nilo RBI emaw Mizoram sawrkar hriatpui na in engkim an ti fel vek a. A hlawkna awm thei tur ang hi chu dawr luah tu tin hnen atanga luah man (rent) kha ani mai a. Mimal leh pawl ten an sum thawh tam dan a zira a hlawkna percentage a insem turin an ti ta bawk a. Hetiang deuh hian company hian a share a zuar thin a ni.

Stock market thil ah reng reng chuan Company in project (hnathawh tur) a neih hian anmahni sum in daih mahse 25% tal hi mipui hnen ah an duha an lei theih turin a ‘offer’ ngei ngei a ngai a, amaherawh chu an nei daih lo tlangpui avang hian 25% aia tam pawh a ‘offer’ thin. An thawh tam dan azira a hlawk na insem tur an ni. Company hian he a project atanga a hlawkna hi a pumbilh thei bik lo tih hriat a tha. Tichuan mipui leh pawl (institutional investor i.e banks etc) chuan an ‘share offer’ chu an han lei a., Offer tu company te hian a offer share a kha an lei atanga reilo te chhung hian Stock market ah an register ngei ngei tur a ni . Hetia stock market-a a register na chhan chu an share lei tu te khan an lo hralh leh duh thei, a nih loh pawn lei duhtu dang an offer laia lei ve hman lo ten an lo leih theih nan a register ngei a ngai a ni. Miin company share a leiin a leina company te hnenah a thleng/hralh let leh thei tawh lo, a neih let leh theihna awmchhun chu an dividend sem atang khana ni tawh mai, chutah an dividend hi kumtin/thla tin sem tur tih pawh a ni lo a, an hnathawh atanga hlawkna an neih leh neih loh ah a in nghat deuh tawp a ni. A duh a nih chuan Stock market ah a hralh mai tur a ni, heta Stock market-a a hralh dawn hian a leina zat ang chiah khan an lo leisak duh kher lo thei bawk a, a nih loh pawhin a leina aia sang pawn an lei duh reng thei bawk. Hetia a leina aia sanga lei duh tu an awm reng hian stock market chu a lo sang ta mai tihna a ni, chutiang bawkin a leina aia hniam chauh a an lei sak duh chuan stock market chu a tla hniam tihna mai a ni.

Company stock reng reng hi lei duha hralh duh tu an awm reng a, entirnan – Reliance share hi vawiin a a man(Price) chu Rs.1200 a ni a, hemi zat hian lei duh tu an awm tam zawk a, hralh duh tu aiin. Chuan Rs.1250 a nih pawhin lei duh tu an la tam zawk zel a, hetiang a hralh duh tu aia lei duh tu an tam zawk zel chuan share value chu a lo sang zel a, share value a san chuan an in register-na Stock Market chu a lo sang mai thin a ni. Hetiang chiah hian Rs.1200 a lei duh tu aia hralh duh tu an tam zawk chuan Stock market chu a lo hniam mai a ni. Stock market hi company a in register te share price san leh san lo ah a in nghat, amahin engti kawng mah in a sang theilo.

Share price san leh hniam na chhan hi a tam khawp mai a, share nei tu mipui leh Institutional Investor (Banks, Foreign Intitutional Investor, Insurance Company, Mutual Fund Company etc.) ten an share lei lai hian return a nei tha dawn riau a an hriat chuan lei belh an duh zel thin.( Nangpawhin han ngaihtuah la, thirchhia Kg.1 Rs. 5 ni thin kha tun atanga thla 1 /2 vel ah Rs.7 a lo ni dawn a, in thenawm tlangval lo khawlkhawm sa kha Rs.5 a i lei theih dawn chuan lei teuh i duh ngei ang, hetia i lei hian an inhnuaia a khawlkhawm sa kha i va put tuih tuih a ngai kher lo, an in hnuai atang khan i hralh chhuak leh mai dawn a ni. ). Sawrkar in Tax emaw thildanga company a chawi tir thin a tih hniam dawn te hian an share value khan a lo san phah thei em em a ni. A chhan chu an tax pek a tlem chuan a hlawkna kha a tam belh lo thei loh vang a ni. Chutiang bawkin Interest rate a tih san/hniam te hian share value chu a effect em em bawkk. Tunhnai Dt.3.1.09 khan sawrkar laipuiin Stimulus Pakage(company tlahniam tur dawm kanna tur) a pass thar a, heta a hman ral tur chu Rs.20,000 Crores lai a ni a. Hemi hnu hian Stock market chu 2% chuangin a san phah nghal pang mai a ni. Chutah Satyam Computers chu World Bank in a ‘barred’ a, hetia a ‘barred’ hian Satyam share value hi 50% dawnin a tlak hniam phah a . A chhan chu World Bank hi Satyam Contract neih lenna ber pawl a ni a, chumai bakah company management ah thil fel lo a awm tih a lang bawk a, management ber a dik tawk loh chuan engtiang in nge an share lei tu (share holder) te return (dividend) tha a pek theih teh lul ang. An tih theih awm chhun chu an share lo lei tawh sa kha Stock market ah hralh daih a ni mai lawm ni?

Company in an product an tawktarh dan te kan hre ta bawk a,stock market lama chiahpuam dan leh stock market kalphung tlem sawi leh phawt ila a tha awm e.Heng Stock market sum che vel ah hian kan lo hlawk ve theihna a awm nual mai a. Chungte chu:

Mutual Fund: An ni hian Manager, stock market leh Company Investment hre deuh te ruaiin mipui investment, mahni a bangbo tak tak tan an lo invest sak ve thin a. Anni hnena investment tih dawn hian a tlem ber ah Rs.5000 vel a ngai thin a ni. Tin, hei mai bakah hian office maintenance, employee salary etc. an charge belh thin a. Company Investment hlawkpui ve duh si, mahnia company hnathawh leh sum dinhmun chi hrang hrang chhut thiam lo tana tih deuh ber a ni. Mipui nawlpui tan an thawk deuh ber tihna anih chu. An invest dan hi company chi hrang hrang , hnathawh chi hrang hrang atangin share an leikhawm deuh ber a, an risk pawh hi a ‘minimum’-(a hniam) deuh ber a ni.

Open Ended: Hemi awmzia chu LIC ah ULIP pakhat I lei a,i pawisa lo invest tawh sa kha rokhawlhna thilah i la chhuak leh duh thut mai thei a, charge tlem te in ila chhuak zung zung thei a,hei hi open ended chu a ni.

Closed Ended : He scheme ah hi chuan i pawisa pek kha hun engemaw ti chhung chu khawih chet theih lohin an dah hmak dawn a ni.(lock in period an ti thin). I mamawh thlu ngang a nih erawh chuan Charge tam deuh hlekin i la chhuak thei tho. Hun engemaw chen khawih chet loh tur a nih bawk avang hian a return pawh Open Ended ai chuan a tam deuh.

ULIP: Unit Link Insurance Plan tihna a ni. An ni hi stock market, company hnathawh hlawkpui reng chung si, engemaw rokhawlhna thil a in venna ni pah bawk an ni deuh ber a. Entirnan: Anni hnen atanga i sum i invest hian, i pawisa pek atang thla hnih khat chhung lekin vanduaithlak takin ilo boral ta thut mai a, an pawisa pek tur tiam che kha, i pawisa pek tur la pe kim lo mah la, an pe don tho che anih chu (chu chu sum assured-thih thut pawha lak tur). Chuan rokhawlhna thil awm lova anni hnen a i invest char char hian an shares lei atanga hlawkna kha i telpui dawn ta a ni. Anni hnen a invest hian pawisa thawh tur erawh a tam deuh ang Mutual fund te ngaihtuah chuan. Insurance leh Mutual Fund in kawp a nih ber chu.Pawisa nei tan chuan ULIP hi a tha hle.ULIP policy hrang hrang hi LIC,ICICI Prudential leh Birla Sunlife te hian an nei tha hle.Direct shares aiin a risk a sang lo bawk.

Direct Share: Heihi Equity an ti mai a. Company shares nangmaha ilo lei tawp ang chi hi a ni. A risk erawh a sang deuh ber, chutiang bawkin a return pawh a sang. Pawisa ngah deuh ten tawn tana lei chi, tihsual palh pawha an pawisa hloh turin a effect em em loh tur ten an lei deuh ber thin. Entirnan: ICICI Shares hi kum 2003 velah pakhat zel Rs.200 vel a lo ni a, kum 2007 velah chuan share pakhat man hi Rs.1200 dawn a ni. Kum 2003 velah i lei chuan i return neih tur chu: 600% daih a nih ta a.I hlawk hle dawn tihna a ni.. Chiahpuam dik tak,SEBI pawmpui thlap ni bawk si,tihfuh chuan chiahpuam tha mi hi a ni ringawt, mahse i hloh theihna chance a sang ve tho tih hriat reng a tha.Direct shares hi tih fuh loh vek vek chuan leiba ngahna a ni a.Vai ho zinga beidawnna thlentu pakhat a ni ve fo.

Share Trading (Intra day, Future & Option): Hei hi chu mahni ah a innghat thui hle. Intraday Trading: He mi awmzia chu company share ni khat chhunga i lei a, nikhat chhung bawka i hralh lehnghal ang hi a ni. Fundamental leh Technical hmangin an trade deuh ber thin. Fundamental chu, 20 march 2009 ah ICICI company in an quarterly result( thla 3 chhung a an hnathawh) an puang a, 15% lain hlawkkna an nei a, 20 march 2008 atanga nena chhutin 15% in an hlok tihna anih chu. Hetiang ah te hian an share man a to ta vak mai thin a. Chumi share man sang lo chang chuan stock market an hawn veleh (9:55am) ah an lo lei ta thin a ni. A to vak han tih hian 250 atangin 270 ah te a chho tlangpui. Nikhat chhunga teh chuan a hlawk hle anih tihna a nih chu. Rs.250 zelah Rs.20 in I hlawk tihna ani ang. Tin, company in contract thar, hlawk ngei tur an hmuh thar te hian an share man a pung hluai mai thin a ni. A chhan chu an dividend (hlawkna-return) beiseiin an lo lei teuh tihna a ni mai.

Technical:  Hei hi chu price movement Chart( Graph) atanga lo chhut dan a ni deuh ber. Company in an result an puan chang te, contract thar anneih chang te hian an share price chet vel  dan zawng zawng hi a graph in a lang leh tho thin a , a pattern a zirin an lo leiin an lo hralh leh ta thin a ni. Stock market trader ho tan hei hi a  in nghahna tlak deuh ber a ni. An sawi lawk (predict) theihna accuracy hi 70% velin a dik tlangpui thin a ni. A awmzia chu, nikhat chhungin company shares 10 an lo lei ta a, 7 an lei dik a, 3 an lei diklo tihna ni. An hlawkna neih chu, 3 an lei sual avangin an tih dik 7 atangin 3 khan an cover ta thin a. an hlawkna neih zat(net gain) chu 4 zawng hi a ni.

Future and Option: Hei hi chu a rei berah thla 3 chhung share an hold thin a, an duh chuan thla hnih khat lek pawh an kawl thiang a ni. Tun thla hnih thum chhung hian he share hi pung dawn chiang a ni an tih chuan Future and Option hmangin anlo lei ta mai thin a ni.

Amaherawhchu, heng zawng zawng ah hian risk hi a involve hnem em em mai a, fimkhur a ngai hle a ni. Mahse chiahpuam te ang( Risk without Knowledge) ni lovin RISK WITH KNOWLEDGE a ni. An policy/scheme reng reng ah risk a involve theih zia an ziah vek avang hian mi tamtak chuan anhlau nghal trung mai ni. Sumdawnna tan dawn pawn kan risk tho a, hetiang lo deuh turah hian an ngaih vang te pawh ni fa hmiang.

Ti khian stock market kalphung, miin engtin nge stock marketah hian pawisa an lo peipun thin dan tur chu kan hrethiam uarin a rinawm a.Artui bawm leh buara ip chhungah chuan a pung tam vak lo ang tih chu a rintheih awm e.

Tichuan tun hun hi Chiahpuam hun a ni em?

Kum 2003 ah i pawisa Rs.1,00,000/- Blue chips company (company lian zual bik tihna-TCS,ONGC,Infosys,Godrej etc ang te hi) ah i invest a, kum 2007 ah chuan Rs.300,000 dawn i khawlkhawm hman der a ni. Kum 3 chhunga a let thuma pung hman hi a tha thawkhat viau, chiahpuam thianghlim(?) hi a ni ringawt. A nih leh tunah hian Stock Market a crash (a hniam lai) hian sum chuangliam deuh nei pha tan invest na (peipunna) hun tha a in hawng ta em tun ah hian?. Han ngaihtuah ta ila,kum 2008 January khan ICICI Bank share pakhat man hi Rs.1000 bawr vel a ni a, tunah hian Rs.250 velin a lei theih der tawh a sin.

Mizo in kan tihsual em em pakhat chu ‘tunlaiin Stock market a sang lutuk, invest na hun tha a ni e’ kan ti mai thin a. Share man san laia invest hi thil tih chi loh tawp a ni.Aizawla agent te ngei min hrilh danin Sensex ‘boom’ (a san lai) lai khan an customer(client) ho share an lo lei sak a, tunah hian a chanve aia tam mah an lost der a ni. Tun ah America financial company lian AIG (American Insurance Group) in an quarter (thla 3 hnathawh) an puan naah USD Billion chuang fe an ‘gain’ veleh ta a, quarter 3 a zawna an lost hnu in, hetiang a nih chuan an impove chho viau tura ngaih a ni. Hemi avang hian an share man pawh 40% lain a chhoh phah dawrh nghe nghe.

India ramah pawh vawiin ni ngei hian Bank ho share 3-5% in a san phah nghal. Global Economic crisis in tanna chu Financial Company ho vang a ni a, anni ber an that chhoh chuan a dang chu tha chho ve nghal tura ngaih an ni.Hetah tak hian lo inkhawl hun a ni ve em keini Mizo te tan?. Company share direct a lei ngam chiah lo tan pawh ULIP(Unit Link Insurance Plan) emaw Mutual Fund lei mai a tha thawkhat viau. ULIP  zawk tak phei hi chuan Capital Assurance an la ti zui a, a awmzia chu i tihsual berah i pawisa invest (Capital) kha i nei let leh ang.Hetah pawh lei sual kan tam thawkhat viau Mizo te zingah, a chhan chu, a san laia lei deuh vek kan nih a vangin. Kum 2003  vel khan tumah in ULIP an lei vak lo, kum 2007-2008 bawr vel khan ani an lei deuh vek ni. Chuvangin khatih hun laia lei ve lo te tan tun hun hi hun tha leh duhawm a ni mai thei. Pawisa nei tan chuan ULIP lei a,chiahpuam hun lai tak a ni.

Tunlai hian kan stock market dinhmun hian kum 2003 vela kan dinhmun kha kan thleng thla leh tawh a. A him thawkhat tawh viau a ni. Tin ULIP leh  Mutual Fund te tak phei hi chu kum tam deuh invest thei ila, la tleirawl tha deuh tan, kan fate zirna hautak lutuk tur kan chhok zan phah thei khawp ang.He thil hi chu ka duh emaw duhlo emaw kan la tawng dawn tho tho. Chuvangin lo in hma khua a fuh ber a rinawm. Tunlaiin ULIP ah emaw Mutual Fund ah emaw  i invest thei ngat a nih chuan kum 2007-08 vela ULIP leh Mutual Fund lei tamtak te aiin a let thum dawnin i hlawk dawn tih chu hrilh kher pawh ngai lo in a chiang sa reng mai.

Fimkhur erawh a ngai

Tun hma leh tun hnai in inbumna hrang hrang a chhuak thin tawh a. Tu thiam loh nge? Kan vai thiam loh a ni. Financial World ( Chiahpuam Khawvel?) ah hian return promise ( a hlawkna sawi sa) zut zut ho hi rin loh tawp tur a ni ringawt.IRDA (Insurance Regulatory and Development Authority) pawh hian a return tur hi sawi a phal lo.Stock market a pawisa invest tura a policy lei Mutual Fund a ni emaw,ULIP a ni emaw,kum 5 chhungin chumi zat chu I la ang tia an zawrh che chuan awih reng reng suh.Mahse ULIP te hi a hlawkna a chhe lo tlangpui. (Silchar tomato i khar chhawnga, Aizawlah engzatin nge i hralh theih dawn, chutah engzat nge i hlep theih dawnn tih hrilhfiah a harsat tluk hian a harsa a ni.)

Mihring kan ni a, sum duham vek, neih belh zel duh kan nihna tak hian min hip zel a, a tawpah kan tlu sawp leh nge nge thin. Chiahpuam runpui kha chu thil kal tawh siamthat theih tawh loh a ni a, sawi tam lo ta ila, kan hma lama thil kan tih sual tawh lohna turin a hnuaia point hrang hrangte hi hriat a tha hle.

- I hnen ah an rawn offer che in an return neih that ber lai kha an sawi thin. Mizo te chang ni lo,vai ho leh sap ho pawhin an sawi thin.Return that lai ber a hlawkna kha a hnu kum 3 kum 5 hnu ah a ni ve kher lo tih hriat lawk tur..

- An return san ber lai an tawktarh che hian dem tur anni lo, an thiamlohna a awm hranlo, I rilru hip tumna mai a ni.Chuvangin nangmah khan internet velah emaw,chinchang hre deuh te rawn kual thin rawh.

- Agent tamtak in an zawrh (offer) che hian an ngaih pawimawh ber chu an commission hlep tur a ni. I tana remchang leh tha, i dinhmun in a zir kha an tum ber a ni lo tih hre tel rawh.

- Mutual Fund te ang bikah hi chuan agent commission kan pek thin hi a pek loh dan a awm ve tho. Online a i lei a nih chuan agent-te commission-help tur (5%) hi i pek kher a ngai lo.

- An registration number dil thin rawh. Tunlai khawvelah i zir chiang thei vek tawh internet kaltlangin.

- Sumdawnna thil vet ho,hlawkna um vet ho an n ia, meng leh meng inbum tumna ang deuh ani tih hi theihhgilh mawlh suh ang che.

- Assets Allocation (I pawisa an hman-na tur ) i hre ngei tur a ni.Agent te hnenah dil thin rawh.

- A hnathawh dan (past performance) dil thin bawk ang che. Company thar leh in register thar an nih erawh chuan lei loh kha a him ber rih.

- Risk a ‘involve’ dan an hrilhfiah ngei tur che ani bawk.Hei hi compulsory a ni.

Hetianga mi thlem tum tamtak hi an sual hrim hrim vang pawh a ni bik lo kan hriat a tha bawk. Khitiang a kan sawi tak zinga sawi duh loh an neih chuan (commission an tel zat tel lovin) rin loh bur tur a ni.

“If you want to be a rich person,  be fearful when others are greedy and to be greedy only when others are fearful”

 

(The Author is a certified Financial Consultant, expert in market and tax analysis. You may contact him @https://www.facebook.com/mawia.mizo?fref=ts)