-na-

Mizoram Sawrkar hnathawk tan pension scheme thar:A tha zawk em?

MIZORAM SAWRKAR HNATHAWK TAN PENSION SCHEME THAR: A THA ZAWK EM ?

Laleng Mawia, Financial Consultant, Mizo Tax Consultancy

Mizoram sorkara defined contributory pension scheme (DCPS) hman ve Cabinet chuan an rel a, hei hian sorkar laipui hnuaia hnathawk pension hlawh pe tawh loin, anmahnin percentage anga pawisa chhûng lutin, sorkarin a do lêt bawk ang a, an pension hunah sorkarin sum seng teuh tawh loin, pawisa tam tak an la rût thei tura ngaih a ni. He dan hi September 1, 2010 atanga Mizoram sorkar hnathawk nghette tana hman tura a ni ang.

Tuna Mizoram sawrkar in a hman mek Defined Benefits Plan (DBP) ah hian pension dawn tur zat hi hna an zawm tirh atanga duan lawk ani thin, Defined Contributory Pension Scheme ( aka. Defined Contribution Plan) ah thung hi chuan bithliah lawk (Fixed) a ni ve lo.

A awmzia ni ta ber chu, Contribution Plan hman chuan tuna pension an dawn thin zat aia tam daih an dawng theia, aia tlem pawh an dawng thei tho, an pawisa khawlkhawm leh a pung hmuh ang ang kha an pension dawn tur a ni tawh ang.

Pawisa thawhtu (sorkar hnathawk) ten anmahni in interest risk an lak a ngai toh dawn a, Stock Market etc. ah return an hmuh that chuan pension pawisa an dawng hnem ang, hmuh that loh chuan tuna an dawn thin aia tlem hi a dawng a ngai tihna. Tin, sawrkar hna, rokhawlhna avangin rei thawk thei lo se, an pension dawn turin a tuar tawh dawn bawk a ni.

Sawrkar tana a thatna:

Sawrkar (Mizoram Govt.) tan chuan a khawi  zawng pawhin Contribution Plan hi a tha zawk. A chhan chu, sum tam tak a save theih tawh dawn avangin. Tuna hmanlai mek Defined Benefits Plan-ah hian miin sawrkar hna a rawn zawm tirha an pawisa rawn thawh zat atanga chhuta sawrkar in a doletna (sorkar contribute pui) hi Govt. bonds, Treasury notes etc. lei nan an hmang thin a ni.

Hetah hian sawrkar-in interest a hmu tha teh chiam ngai lo, an pension pek tur zat hi 8.5% p.a. vel a ni a, hemi zat interest hi a changin a hmu a, a changin a hmu phalo thin (Synod buaina ang chiah). Pawisa a zuk deposit-na hi Bank te angin fixed return a ni lo, kumtin a danglam ve thin a ni. (Tun dinhmun ah pension atana pawisa tlingkhawm hi stock market ah 5% tak ngial pawh dah an rem ti lo Provident Fund Board in).

Heta interest a hmuh that loh chang hian sawrkar in pawisa thawh belh sak a ngai ta thin a (pension pek tur zat bi thliah lawk a nih avangin). Interest hmuh that chang erawh chuan a thawhpui zat a hniam veleh thung thin. Heng bakah hian hetianga pawisa thawhpui ngai zat lo chhut tur hian sawrkar in Actuary a ruai thin, hemi te rawih nan pawh hian sum tam tak a seng thin. Tuna an hman tur Contribution Plan ah chuan Actuary rawih a ngai tawh lovang.

Sawrkar hnathawk tana a thatna:

Stock Market ah pawisa an duh zat an invest tel theih tawh dawn a, an pawisa deposit chhung tur hi an sawrkar hnathawh chhung zawng kha a ni. Stock Market-ah hian pawisa dah rei poh leh risk a tlem tial tial thin a, tuna an dahna ve thung Govt. Bonds etc. ah thung hi chuan an dah rei poh leh risk a tam tial tial ve thung, dah maia. Stock Market nen a in opposite chiah a nih chu. Chutah Sawrkar hnathawk ten an service chhung (approx. 33 yrs) pawisa an dah thin avangin Stock Market hi a thlan awm zawk hle. Tun dinhmun ah India ram bikah chuan Stock Market average return hi 15%-25% p.a. vel a ni.

Tin, kum 10 chhunga pawisa return hi Stock Market tluk tu an la awm lo, India ram mai ah a ni lo, khawvel pum ah a ni.(chiahpuam anga puam trual trual kha khawi ramah mah i nei reng thei ngai lovang)

Entirna nen lo dah ila: I thla hlawh atangin Rs.1500 thlatin i pension (GP Fund) ah lo dah thei la, tuna pension hman lai mek ah hian, an service zawh huna an lak theih zat tur chu: Rs. 32,53,651/- a ni. (Service Year – 33 Yrs)

Pension thar hman tura return theih zat ve thung chu: Thlatin Rs.1500 pension atana dah in leh kum 33 hnuah – Rs. 1,63,09,103 (Hei hi Stock Market Lower Average Return 15% p.a.). Stock Market Higher Average Return (25% p.a.) ah ve thung: Rs. 25,31,20,121/- (Are yaar Crorepati)

Langtlang pension ani tawh ang, tuna hman mek ah hi chuan i pawisa chhun luh ve te kha i GPF ah bak an lut lova, i pension pawisa tak hi chu sawrkar thawhpui ve che atangin a ni zawk. Hetah hian engzat nge in khawlkhawm tawha, engzat nge a pung te nen ni tawh tih i hre thei mai thin lo, a thar ah hi chuan engzat nge pension atan i lak theih tur i hre zung zung tawh ang.

Sawrkar hnathawk tana a that lohna:

Khiti zata tam sum leh pai hmuh theih tak avang khian lo nui vur vur suh, hei chanchin tha ni ve chiah lo chu: Tuna pension hmanlai mek Defined Benefits Plan-ah hian, i hlawh hmanga i khawsakna level (standard of living) mil tura pension hi siam a ni. Thil man to tak avang te, mihring dam hun chhung rei tak avang te a i tuar lohna tawk tura pension sum hi pe thin che an ni. Fixed a ni kan tih tawh kha. An pension dawn tur zat hi pension-a an chhuah dawna an hlawh zat mila siam rem thin a ni (Formula a awm)

Stock Market atang khian khiti zat interest rate khi i hmu ngei ngei dawn e tihna a ni lo, engpawh a thleng thei he khawvel ram zau ah hian. Risk i la tel ta tihna a nih chu, a hma zawnga risk lo awm thin kha chu sawrkar in a hmachhawn sak mai thin che a, tunah chuan nangman i hmachhawn a ngai ve ta tih na a ni.

Kum upat tawh hnu a sawrkar hna vuan te tan a hlawk teh chiam lo, a chhan chu an pawisa khawlkhawm leh an interest hmuh ang ang kha an pension dawn tur anih tawh avangin.

Tha zawk ni a ka hriat chu:

Security tha zawk hi duhthusam chu a ni, Defined Benefits Plan-ah khian risk a awm lova, i dawn tur zat chu mathei lovin i dawng dawn, contribution plan ah ve thung chuan i dawn tur zat hi a chiang tlat lo, chuti Defined Benefits Plan chu a tha zawk tihna em ni ?

Contribution kan hman khian i tawrh theih te chu: (1) Stock market tlahniam vak (2) Service rei hman lova  ilo boral emaw, vanduaina ilo tawh palh tak in (3) kum upat hnu a service i zawm in. Anih hengte hi Risk Management hmangin kan paih bo thei ang em?

Kan paih bo theih dan chu, Stock Market tlahniam vak khi, sorkar fund leh company stock te contribution siamin enge maw chen a tih bo theih. A chhan chu Stock market chhiat laiin sorkar fund ten an return tha thin, chutiangin stock market that lain sorkar fund ten an return chhe ve leh thin!

Anih service rei hman lova  ilo vanduai in ? Heipawh hi Insurance + Investment hmangin a paih bo hmak theih. ULIP lak hian a claim lamah harsatna namai lo tak a thleng chawk. Mahniin Company stock leh Term insurance hman kawp mai a fuh hmel (Hetah hi chuan a ngaihna hria te rawn mai a tha).

He pension fund thar tur hi sorkar tan thawk hua na tham a nih bakah a dawng tur te 90% zat aia tam mahin an hlawkpui dawn avang in, a tha zawk mai lawm ni? Sorkar hnathawh laia vanduai, pension sum khawl khawm thahnem hman lo tur te chu, service kum 10 pawh nei tling lo te anih a rinawm a, heng mite hi 10% an tling lo turah ka ruat ve tawp, dik tak maw?

Kum upat hnu a service zawm khi chu han tih dan vak a vang hle in a hriat, Kristian ram te kan ni bawka, kan tawngtai pui mai dawns?

(The Author is a certified Financial Consultant, expert in market and tax analysis. You may contact him @https://www.facebook.com/mawia.mizo?fref=ts)